दसैंको फुर्सदमा कुन-कुन किताब पढ्ने ?

१२ असोज, काठमाडौं । के तपाईं दसैंबिदाको फुर्सद किताब पढेर बिताउने तयारीमा हुनुहुन्छ ? त्यसो हो भने पुस्तक छान्नका लागि साझा प्रकाशनले काठमाडौंको सभागृह परिसरमा आयोजना गरेको पुस्तक मेला उपयुक्त थलो बन्न सक्छ । दशैंलाई लक्ष्य गरेर आयोजना गरिएको यो मेलामा साझाबाहेक ५१ वटा प्रकाशन गृह र व्यक्तिगत प्रकाशनका गरी २६ सयभन्दा बढी आइटमका पुस्तक राखिएका छन् । मेला असोज १७ गतेसम्म चल्ने बताइएको छ ।

साझाले यसपटक ०६० अघिका पुस्तकमा ४० प्रतिशत र त्यसपछिका पुस्तकमा ३० प्रतिशतसम्म छुट दिएको छ । यो सुविधा साझाका बिक्री शाखा, उपशाखा भएका ठाउँहरुमा समेत दिइएको छ । गतवर्ष यही समयमा एक करोड १८ लाखको पुस्तक बिक्री गरेको साझाले यसपटक दुई करोडको बिक्री गर्ने लक्ष्य राखेको छ ।

उपत्यका बाहिरका मेलामा साझाबाहेकका अरु पुस्तकहरु खासै उपलब्ध नभए पनि काठमाडौंको मेलामा भने नयाँ-पुराना सबै बान्कीका पुस्तक छन् । केही प्रकाशन गृहहरुले त यही मेलालाई लक्षित गरेर समेत पुस्तकहरु सार्वजनिक गरेका छन् । यसरी पुस्तक निकाल्नेमा फाइनपि्रन्ट, सांगि्रला बुक्स र याम्बुरी बुक्स सबैभन्दा अगाडि देखिएका छन् ।

नयाँ पुस्तक के-के छन् ?

मेलामा ०६९ को मदन पुरस्कार प्राप्त राजन मुकारुङको दमिनी भीर, सुधीर शर्माको नयाँ पुस्तक प्रयोगशाला, पद्मश्री सम्मान प्राप्त शारदा शर्माको ताप, नयनराज पाण्डेको घामकिरी लगायतका कृति २० प्रतिशत छुटमा उपलब्ध छन् । बिक्रीमा पनि यिनै पुस्तक अगाडि देखिएका छन् ।

मुकारुङको दमिनी भीरमा गाउँघरमा हुने शोषण अत्याचार, द्वन्द्वले निम्त्याएको घाउ र संघीयताको मुद्दालाई आख्यानात्मक पारामा उठाइएको छ । त्यस्तै सुधीर शर्माको प्रयोगशालामा विेदेशीहरुले हाम्रो मुलुकलाई कसरी प्रयोगशाला बनाइरहेका छन् ? नेताहरु कसरी विदेशीका दलाल बनिरहेका छन् भन्ने कुरा सप्रमाण प्रस्तुत गरिएको छ । शारदा शर्माको ताप युद्ध व्यहोरेकी युवतीको भोगाइमा आधारित छ । बौद्ध दर्शनको सार कुरा मिसाएर विसंगत सामाजिक परिवेशलाई सर्लक्कै उतारिएको छ । पाण्डेको घामकिरीचाहिँ लेखकको अनुभूतिमा आधारित प्रेममय उपन्यास हो ।

अन्य उपन्यासहरुमा जगदीश घिमिरेको सकस, अखण्ड भण्डारीको मलाया एक्सप्रेस, कृष्ण अविरलको विषपुरुष, उमा सुवेदीको तोदा, सुविन भट्टराईको समर लभ, राजवको बेकारीमा उपन्यास, टंक चौलागाईको काठमाडौं गीत, रमेश पौडेलको द सुपि्रम हृयुमन, राजेन्द्र थापाको द्रौपदी आदि पनि राम्रै संख्यामा बिक्री भइरहेका छन् । आख्यानमा रुचि भएकाहरुका लागि यी उपन्यास राम्र्रै खुराक बन्न सक्छन् ।

मेलामा नयाँखाले स्वाद बोकेका कथाकृतिहरु पनि मनग्ये उपलब्ध छन् । त्यसमध्ये महेशविक्रम शाहको ज्याक्सन हाइट कथासंग्रह भित्रका कतिपय कथाले तपाईंलाई भावुकताको गहिराइमा चुर्लुम्म डुबाउन सक्छन् । नयाँ कथाकारहरु विद्या सापकोटाको नीलो तृष्णा, मिलन संग्रौलाको च्याट गर्ल, सुन्दर जोशीको क्यासल रककी अप्सरा पछिल्लो समय पाठकद्वारा रुचाइएका कथा कृति हुन् । भर्खरै बजारमा आएको सरुभक्तको विज्ञान कथाहरुको संगाँलो पनि तपाईंका लागि राम्रो खुराक बन्न सक्छ ।

यसपटक निबन्धात्मक कृतिको त एकप्रकार बाढी नै लाग्यो । हरिवंश आचार्यको चिना हराएको मान्छे यसवर्षकै बिकाउ पुस्तक बन्यो । विनोद चौधरीको आत्मकथा पनि निकै रुचाइएको प्रेरणास्पद निबन्ध कृति हो । त्यसैगरी श्यामलको रित्तो गाउँ, गोविन्द वर्तमानको हरियो साइकल, श्रीओम श्रेष्ठ रोदनको एक्लो परिचय, भीष्म उप्रेतीको हतार छ, हतार छैन, शेखर खरेलको ‘मैले नदेखेका हिप्पी’, दीपक सापकोटाको ‘लोकेशन’, रोशन शेरचनको धोवीघाट एक्सप्रेस सरल भाषामा लेखिएका पठनीय निबन्ध कृति हुन् ।

जनदिशा दैनिक सम्बद्ध दीपेन्द्र रोकायको ‘नाफाको जिन्दगी’ले जनयुद्धकालका थुप्रै अदृश्य पाटाहरुलाई उजागर गरेको छ । सामाजिक अध्ययन गर्न चाहनेहरुका लागि मोहन मैनालीको उपल्लो थलो गतिलो स्रोत सामाग्री बन्न सक्छ ।

यसवर्ष अपराध जगतका बारेमा जानकारी दिने कृति पनि पाठकले निकै रुचाइए । तपाईंलाई पनि रुचि छ भने केपी ढुंगानाको ओपन सेक्रेट, दिपेश केसीको नेपालमा अपराध, सरोजराज अधिकारीको ‘चक्रव्यूहमा चन्द्रसूर्य’ आदि पढ्दा राम्रै खुराक मिल्न सक्छ ।

कवितामा पनि राम्राराम्रा कृति उपलब्ध छन् । पछिल्लो समय निस्केमध्ये रमेश क्षिजितको घर फर्किरहेकको मानिस, उपेन्द्र सुब्बाको खोलाको गीत, ठाकुर बेल्बासेको त्रासमा ईश्वर, शकुन्तला जोशीको आदिम सिमाना पाठकबाट रुचाइएका कविता कृति हुन् ।

यदि सेल्फहेल्पका पुस्तक पढ्न मन पराउनु हुन्छ भने भर्खरै डा. विकाशानन्दको जीवन के हो ?, अनिल चित्रकारको अघि बढौं, धीर भण्डारीको परिवर्तनकारी जीवनदृष्टि आदि पुस्तक बजारमा आएका छन् । अध्यात्ममा रुचि राख्नु हुन्छ भने पनि साझाको मेलामा छानीछानी पुस्तक किन्न पाइने अवसर छ । विश्वप्रसिद्ध व्यक्तिहरुका जीवनी पढ्ने मन छ भने गौतम बुद्ध, महात्मा गान्धी, विवेकानन्द, स्टिभ जब्स, नेलसन मण्डेल, हिटलर आदिका आत्मकथाहरु नेपाली भाषामा उपलब्ध छन् । साझाले प्रकाशनमा ल्याएको मदनमणि दीक्षितको आत्मकथा ‘आनन्दमय जीवन’ पनि निकै रोचक छ । छोराछोरीको दसैंपाठ्यक्रम बाहिरका किताब पढेर बितोस् भन्ने चाहनुहुन्छ भने बालवालिकाका लागि पनि मेलामा मनग्ये पुस्तक राखिएका छन् ।

मेलामा माथि उल्लेख भएबाहेक अघिल्ला वर्षहरुका हिट पुस्तकहरु प्रायःसबै उपलब्ध छन् । तपाईंले आफ्नो रुचि अनुसारका पुस्तक रोजीरोजी किनेर दसैंलाई ज्ञानवर्द्धक र रमाइलो बनाउन सक्नु हुन्छ ।

अनलाइनखबरको एन्ड्रोइड एपका लागि यहाँ क्लिक गर्नुहोस् । तपाईं हामीसंग फेसबुक र ट्वीटरमार्फत् पनि जोडिन सक्नुहुन्छ ।

समाचार

• मन्त्रिपरिषद् अध्यक्षले आज राष्ट्रसंघ महासभालाई सम्बोधन गर्ने
• नेपाल टेलिकमको मोवाइल सेवा अवरुद्ध
• हरिसिद्धीमा तीन दल र ३३ दलका नेतावीच गोप्य वार्ता
• हराएको चिना खोज्दै हरिवंश नेपालगञ्जमा
• एमाले कम्युनिष्ट नै हैन, एमाओवादी एमाले बन्यो : बैद्य

खेलकुद समाचार

• शिरीषद्वारा राष्ट्रिय कीर्तिमान कायम
• इराकविरुद्ध उत्कृष्ट पुनरागमन गर्दै नेपालले बराबरीमा रोक्यो
• मेस्सी स्पेनको अदालतमा हाजिर
• राष्ट्रिय क्रिकेटमा एपीएफसँगै काठमाडौं र नेपालगञ्जको दोस्रो जित
• टी-२० राष्ट्रिय क्रिकेटमा काठमाडौं, नेपालगञ्ज, वीरगञ्ज र एपीएफ विजयी